بيحصل ايه في الجسم لو اتسممت بالباراسيتامول ؟!

ازاي بيحصل تسمم الباراسيتامول

 لما حد يسألك عن تسمم الباراسيتامول ..بتجرى وتقول نديله استيل سيستاين نقولك طب أهدى بس ليه بتدى استيل سيستاين ؟! تقول لأنه ال Antidote بتاعه نقولك عفارم عليك جبت التايهه ...ايوه يادكترة ليه برضه هو ال Antidote بتاعه ؟!


طيب عشان تبقي دكتور فاهم انت بتعمل ايه وبطلع ايه لازم تعرف كيفية حدوث التسمم بالبارسيتامول وايه اللي بيحصل في الكبد مع وصول جرعة زائدة من الباندول او غيره من المنتجات الدوائية التي تحتوي علي الباراسيتامول


القصه بدأت من دخول الباراسيتامول الجسم ودخل عالكبد عشان يحصله Metabolism زى بقية أدوية الله ولكن هو رخم شوية دخل الكبد وقال والله لازم اسببله مشكله فيقوم متحول لمادة سامه اسمها NAPQI المادة دى تيجى تسبب مشكله للكبد...تلاقى فتوة الكبد الجلوتاثيون Glutathione بيمسكها من قفاها ويحولها لمادة غير سامه ويرميها بره الجسم ...طب قدر عليها ازاى ؟

لانه بيحتوى على مجموعه اسمها Sulphydryl group اللى بتعشقها مادة الNapQi السامه فيقوم ممسكهم ف بعض وراميهم بره.


لكن الجلوتاثيون ده مش قاعد للكبد على طول ...يعنى اول مايلاقى كمية المادة السامه NapQi اتكاترت عليه بيختفى ومايبقاش موجود ويبقي الكبد لوحده وتبدأ المادة السامه تنهش ف الكبد وتستفرد بيه وتبهدله وتعمل خلل ف وظائف الكبد ..


طب انت محتاج ايه ياعم لو الجلوتاثيون خلص ؟! 

محتاج والله أى حاجه فيها المجموعه اللى بتحبها مادة ال NapQi عشان تاخدها وتغور من الكبد وتخرج بره الجسم .


طب المجموعه دى فين ؟

وجدوا المجموعه دى ف مادة الاستيل سيستاين ومن هنا بدأ استخدامه بديل الجلوتاثيون و Antidote ف حالة التسمم بالباراسيتامول .


أحدث أقدم

♥ يسعدنا ان تنضم لقناتنا PharmaDay علي تيليجرام ليصلك كل جديد ♥