كما نعلم خلال ايام اعلان تكليف دفعة صيدلة دفعة 2020 والكل يريد معرفة المزيد من المعلومات عن التكليف من حيث المميزات والعيوب وهنا في هذا المقال كلام منقول عن دكتور صيدلي لديه خبرة كافية عن التكليف اتنقل في اكتر من مكان عمل بأماكن شغل التكليف المختلفة بينقل خبرته كالتالي:
الحدوته بتنقسم الي 3 اقسام رئيسية (بعيدا عن شغل الهيئات الجديدة زي سلامة الغذاء والتأمين الشامل.. إلخ)
القسم الاول: التأمين الصحي
القسم التاني:
المراكز المتخصصة ودي مجموعة من المراكز المتخصصة والمستشفيات بتكون متخصصة فى علاج امور معينة زي مثلا مستشفيات او مراكز القلب او مراكز الجهاز الهضمي والكبد، المستشفيات التعليمية، ومستشفيات الأورام وبنوك الدم ومجموعة أخري من المستشفيات والمراكز المتخصصة زي مستشفيات النفسية والعصبية، وهكذا…ودي كلها بتتبع ما يسمى بأمانة المراكز المتخصصة
القسم التالت:
المديريات الصحية بالمحافظة وما يتبعها من مستشفيات عامة أو مركزية كمستشفي بنها العام او المركزي مثلا وما يتبع المديريات الصحية من إدارات المراكز (الإدارة الصحية) ثم ما يتبع هذه الإدارات من وحدات صحية بالقري (الوحدات)
في بداية تكليفي اتعينت فى مستشفي تعليمي ودي تتبع أمانة المراكز المتخصصة والمكان اللي كنت فيه كان حوالينا مركز القلب وجنبنا مركز الاورام ومركز الجهاز الهضمي وبنك الدم فى المحافظة اللي احنا فيها، فكان حوالينا كل الاماكن بحيث ان خبرتي دي بناء علي المكان اللى كنت فيه والاماكن المحيطة
امانة المراكز المتخصصة بتتميز بأربع أمور رئيسية:
1- الوجاهة الاجتماعية ..دايما اللي شغال في اماكن زي مراكز القلب والاورام والكبد الخ بيكون له قدر معين من الوجاهة الاجتماعية أعلي شوية من المستشفيات العامة والمركزية اللي الجمهور والناس بتنظر للي شغال فيها بصورة أدني شوية مما لو كنت في المراكز المتخصصة
2- النقطة التانية ان الاماكن دي بيكون فيها قدر شوية زيادة في المرتبات علي صورة حاجات اسمها (حوافز وبدلات وصندوق) ..طيب الفلوس دي بتيجى منين؟ الفلوس الزيادة دي - في بعض المراكز المتخصصة وليس كلها – بتيجي من انه المراكز دي بيكون فيها بعض العلاجات الغير مجانية او مدفوعة الأجر وبالتالي الفلوس دي بتتحط فى حاجة اسمها الصندوق وبتتوزع علي الموظفين مع مصادر تانية من التمويل
3- النقطة التالتة ان الاماكن دي فى الغالب بتكون اماكن نضيفة علي عكس المستشفيات المركزية والعامة اللي جزء كبير منها للاسف مافيهوش نظام او آدمية في التعامل وكل هذه الاشياء اللي كلنا عارفينها مش للمريض بس انما للدكتور والصيدلي اللي شغال بداخلها اللي بيكون قاعد علي كرسي مكسر ومكتب مكسر ومكان مش نضيف ولمض مش منورة وقصص كدا اللي داخل المستشفيات يعرفها لكن المراكز المتخصصة اغلبها بتكون عكس كدا في بعضها اماكن مكيفة ومكاتب وكراسي حديثة ولو تكييف باظ او كرسي اتكسر بيغيروه بشكل محترم ودا بحكيه عن ما رأيته في عملي فى المراكز المتخصصة وممكن يكون مش كلها كدا لكن دي تجربتي ودا المشهور عنها واللي زمايلنا نقلوه لينا من خلال شغلهم فيها ، فهيا مراكز فيها وجاهة ونضيفة وقدر زائد في بند المرتبات
4- النقطة الرابعة وهي التفتيشات .. الموظف الحكومي خاصةً الصيدلي يعرف قد ايه كلمة تفتيش بتكهربه، لانه بيبقا في رقبته عهدة ومعروف ان العهدة دي من الحاجات اللي صعب ظبطها بالذات في الادوية ..لما تبقا صيدلي وتصرفلك في اليوم مثلا 20-30 لحد 50 و 100 تذكرة وفي اماكن 300-400 تذكرة يوميا ، هتعرف قد ايه ان انت تظبط العهدة دي حاجة بتبقا أمنية بالنسبالك ، صعبة المنال وتحقيقها بيكون غاية فى الصعوبة وممكن ما تعرفش تظبطها الا في اخر يوم من الشهر واحيانا في اخر ساعة من الشهر!، فبيبقا ظبط العهدة بالنسبالك مشكلة ..عشان كدا التفتيش بالنسبالك بيبقا زي البعبع أول ما تسمع ان فيه تفتيش ركبك بتسيب ..ليه؟ لان انت لو في مكان كمية الادوية اللي فيه مثلا كبيرة فبناءً علي كدا العهدة بتاعتك هتكون كبيرة وانا اشتغلت في مكان العهدة بتاعتي كانت تقترب من المليون ماسك علاج علي نفقة الدولة ، فلو جالك تفتيش مثلا ولقا 3-4 علب دواا ناقصين لو هو تفتيش حب يرخم عليك شوية هيدفعك تمنهم ، ممكن علب الدوا دول يقع عليك تمنهم بـ 5-6 آلاف جنيه لو تمنهم غالي، اللي هو بالنسبالك مرتب شهرين مثلا..فالشاهد في الموضوع ان التفتيش دا بيبقا تقيل علي أي موظف حكومي خصوصا الصيدلي...في المراكز والامانات المتخصصة بقا يعتبر هي اقل الاماكن اللي بينزل عليها تفتيش..ايه السبب؟ ان المراكز دي زي ما قلت لحضرتك هي فرع مستقل من وزارة الصحة لا تتبع مديريات الصحة اللي في المحافظات، بمعني انه ما بيجيش ليك تفتيش من المحافظة اللي انت فيها إنما بيجيلك تفتيش من الامانة اللي انت تابع ليها في القاهرة ، يعنى مثلا انت تبع مستشفيات الصحة النفسية، يجيلك تفتيش من أمانة الصحة النفسية بالقاهرة وينزلولك من القاهرة يفتشوا عليك..تبع مستشفيات الأورام يجيلك تفتيش من القاهرة..وهكذا...انما مديريات الصحة اللي انت فيها في محافظتك مالهمش دعوة بيك، ودا بيقلل معدل التفتيشات عليك وقد يكون مرة او مرتين تلاته سنويا ..ودا أمر بيكون مريح بالنسبالك.
طيب الاماكن دي قولنا مميزاتها..فيها عيوب؟
اه فيها عيوب طبعا .. ركز معايا..
اول العيوب ان حضرتك طالما استلمت في مركز متخصص وارتبطت بيه فغالبا هتفضل مرتبط بيه باقي حياتك مش هتعرف تسيبه ..فيه مشكلة حاليا في النقل والانتداب في الحكومة وهي انك عشان تنقل وتنتدب لازم يكون دا جوه المكان او الجهة اللي انت ارتبطت بيها ..يعني انت مثلا ارتبطت بوزارة التربية والتعليم ما ينفعش تتنقل او يتم انتدابك لوزارة الصحة او الرياضة مثلا ..كذلك المراكز المتخصصة دي ما تعرفش تنقل منها او تعمل انتداب مثلا لمديرية الصحة ودا في منتهي الصعوبة بل يكاد يقترب من المستحيل ويحتاج وسايط أقل واسطة فيها هي عضو مجلس شعب يروح يجيب لك امضاء من الوزير عشان تعرف تنقل من أمانة مراكز متخصصة الي مديرية الصحة ..فالنقل من الاماكن دي لأي سبب كان في منتهي الصعوبة...يعني لو انت شغال مثلا في مركز قلب والمكان تاعبك ومضغوط جدا فيه وعايز تنتقل..عشان ينقلوك ودا بشق الانفس برضو، هينقلوك فين؟ لمركز قلب في مكان تاني وممكن يكون المكان التاني دا في محافظة تانية خاصة لو مركز القلب اللي انت شغال فيه مافيش غيره في محافظتك مثلا..وليكن انت في مستشفي القلب في المنوفية ووافقوا علي نقلك يقولك مثلا فيه مستشفي القلب في القاهرة او اسيوط او اسكندرية اختر لك واحد منهم ننقلك عليه..لكن انك عايز تنقل لمستشفي تبع وزارة الصحة او ادارة صحية او وحدة صحية الكلام دا من ضرب المستحيلات..
من العيوب في المراكز المتخصصة كذلك للصيادلة ان بعض الاماكن دي العهدة فيها بتكون ضخمة زي مثلا مستشفيات الأورام بتكون العهدة عليك غالية تقترب من ملايين وبتكون عهدة تضامنية أنت و 4 صيادلة معاك وليكن ماسكين صيدلية صرف معينة فيها كمية أدوية وليكن 2 مليون واماكن تانية بتبقا اكتر والعهدة دي بتاعتك ، لو اتسرق منها حاجة او ضاع منها او تلف حاجة او حصل غلط في الجرد او غلط في الصرف وجه تفتيش عليك بيحملك كل دا وممكن تتحول بسببه لنيابة ادارية يتحقق معاك وممكن الأشد منه تتحول لنيابة اموال عامة وفي الاخر هتدفع تمن العجز وتاخد جزا ، وحاجات من النوع دا ..والحاجات دي بتحصل كتير ، وأسوأ الحاجات دي هي السرقات..أحيانا بيكون موظفين شغالين معاك بيسرقوا بعض هذه الأدوية وبناءً علي كدا حضرتك اللي بتتحمل العجز لانه عهدتك ، وأنا أعرف أماكن حصل فيها نقوصات في العهدة من كذا سنة بمبالغ تقترب من النص مليون وتحملها ودفع تمنها الصيادلة، حاليا تمن الادوية دي يقترب من 3 مليون ، فللأسف الصيدلي بيمضي علي العهدة ولو نقصت فهو بيتحملها ..
كذلك من عيوب المراكز المتخصصة ان اغلبها ان لم يكن كلها تحول للحضور والانصراف بالبصمة سواء بصمة صباع او بصمة عين او وجه الخ فالنهارده مثلا ميعاد حضورك الساعة 8 ومن 8:15 تبدأ تتحسب التأخيرات ولو اتأخرت خمس دقايق كمان بيتشطب عليك اليوم الخ..
فالحضور والانصراف في الاماكن دي بيكون في غاية الصعوبة ..انا مش بكلمك في نقطة انت هتروح ولا مش هتروح ، انت كدا كدا هتروح ، أنا بكلم حضرتك في نقطة انك لو اتأخرت هيحصل معاك ايه ..إما يتحسب لك تأخيرات أو يتشطب عليك وقصص من النوع دا ..
دي كدا المراكز المتخصصة من حيث عيوبها ومميزاتها بشكل إجمالي وفيه تفاصيل تانية خاصة بكل مكان لم تذكر لان الكلام يطول فيها وأكيد عند البعض منكم تفاصيل عنها زي ضغط الشغل الكبير في الاماكن دي مثلا.
ننتقل للقسم التاني وهو العمل في مديريات الشئون الصحية بالمحافظات (وزارة الصحة يعني)
زي ما قولنا فيه مديريات صحية ثم ادارات صحية ثم وحدات صحية ، وفيه مستشفيات عامة ومركزية..
المديريات الصحية والادارات الصحية في الغالب بيكون العمل فيها في صورة عمل ادارى إلا لو مسكت حاجة اسمها العمل في الطعوم والأمصال ودي بتكون عهدة ، أو مسكت مثلا مخزن أدوية ودي عهدة برضو ، وشغلهم زي شغل المستشفيات: صرف ووارد ومنصرف وحاجات زي كدا ، إنما لو اشتغلت في اماكن تانية جوه المديريات الصحية زي مثلا الطب الوقائي والطب العلاجي والرعاية الأساسية وما شابهها داخل المديريات الصحية = دي بتكون شغلها أعمال إدارية ، أغلبها بتكون أعمال تفتيش..بيدوك مثلا check list كدا ويقولك انزل فتش..مثلا لو مسكنا ادارة زي ادارة الرعاية الاساسية ودا مكان انا اشتغلت فيه في مديرية الصحة واشتغلت عمل ادارى وظيفته ان حضرتك بتنزل تفتش علي الوحدات الصحية بـ check list وتعلم ايه موجود وايه مش موجود والدنيا ماشيه صح ولا غلط وما الي ذلك ، وفي الاخر بتكتب تقرير وترفعه ..فأنت مش عليك مسئوليات ولا عليك عهدة فقط مجرد عمل ادارى حلو وظريف ..والمديريات الصحية العمل فيها في الغالب بيكون عمل مريح وعشان كدا البعض بيرشحه ..المرتب فيه يعتبر مافيهوش زيادات ولا بدلات ولا صناديق بصفة عامة غير مبلغ بسيط اسمه بدل اشراف ما بيكونش كبير، والحضور والانصراف فيه بيكون علي حسب المكان والمديرية ... وبصفة عامة الحضور والانصراف في المديريات والادارات الصحية احيانا بيكون فيه نفسنة بين الموظفين بسبب عدد الموظفين الضخم فلو فرضنا مثلا ان الموظف اللي ماسك دفتر الحضور والانصراف بيمضي لدكتور او صيدلي فالدكاترة التانيين بيقولو اشمعنه تمضي ليه واحنا لأ وتحصل مشاكل فيبدأ الدفتر دا يتبعت للنيابة ويبدأ يبقا الحضور والانصراف ميري 8 بالدقيقة واللي يتأخر ثانية ولا اتنين يتشطب عليه وتوصل بالكتير لـ 5 دقايق ..وأمور وحاجات من دي كتير بتحصل في المديريات الصحية ودي عيوبها، لكن مميزاتها انها عمل سهل وسلس وظريف وعمل اداري في أغلبه ومريح ، بالعكس انت بتبقا مفتش وتنزل تفتيش علي وحدات صحية ..وأحسن مكان عمل في المديريات الصحية هو التفتيش الصيدلي ودا عشان توصل له بيبقا صعب جدا جدا ..وبيكون في الغالب لازم تقدير عالي وكذلك بمسابقات بتنزل بتقدم عليها ، وطبعا كونك تبقا مفتش صيدلي دا منصب كبير يعتبر ومعاك ضبطية قضائية تنزل تفتش علي الصيدليات وكدا ..دا كدا اللي فات لو اشتغلت فيه في مديرية الصحة هيبقا مريح بالنسبالك ، ما عدا الطعوم والأمصال لان دي بيكون فيها قصص ومشاكل كتير عشان فيها عهدة وفيها منتهي الصلاحية ومشاكل من دي..فلو عرفت ما تستلمش فيها يبقا افضل وانقل لحاجة غيرها.
الشغل في المستشفيات العامة والمركزية عبارة عن شغل صيدلي بيصرف دوا للمواطن أو صيدلي ماسك مخزن دواا جوه المستشفي ، شغل وارد ومنصرف وعهدة وجرد وقصص من دي اللي هو العادي بتاع الصيدلي في اي مكان ودا الشغل التقليدي بتاع الصيدلي عادةً ما بيبقاش فيه مشاكل علي حسب المستشفي وادارتها فيه مستشفي مريحة وفيه مستشفي غير مريحة مع الاخذ في الاعتبار الجو العام لشغل المستشفيات دي بصفة عامة من عدم النظام في المكان وسوء المكان وعدم النضافة فيه والأمور دي كلها ..
طيب أنا في وجهة نظري أفضل مكان تشتغل فيه هو الوحدات الصحية مع احترامي لوجهات النظر اللي بتقول ان الافضل هو شغل المديريات الصحية وأنا كواحد اشتغلت في مديرية صحية وفي الرعاية الأساسية زي ما قلت واشتغلت كذلك في المراكز المتخصصة وجالي تكليف في مستشفي مركزي روحتها يوم واحد وما كملتش بسبب سوء الإدارة وعدم نظافة المكان وعدم النظام اللي فيه ، واشتغلت في وحدة صحية وأنا حاليا في وحدة صحية ..أفضل مكان للعمل الحكومي للصيدلي هو الوحدة الصحية للمميزات اللي هقولها ودي من وجهة نظري الشخصية :
الوحدة الصحية حضرتك بيكون موضعك في الوحدة الصحية إما مدير أو نائب المدير، لو فيه طبيب هيبقا هو المدير وحضرتك نايب المدير ولو مافيش طبيب حضرتك هتكون المدير المباشر في المكان ومعني انك تكون مدير المكان ممكن البعض يقول يعني ايه مدير على 3-4 موظفين بالمكان؟ المقصود مش كدا ، إنما معني انك مدير للمكان إن مافيش حد فوقك ودا معناه انك لو مثلا مش مدير للمكان ومديرك انسان مش كويس هيقرفك ودي أكتر حاجة بتؤرق الموظف الحكومي ان يكون مديره متعب وقارفه في حياته ، بينما لو مديرك محترم وكويس هتقضي حياتك العملية في الحكومة مرتاح ومبسوط بشكل كبير بدون ضغوط أو منغصات لاسيما لو فيه تبادل احترام وود بين المدير للمكان والمرؤوسين اللي شغالين تحته ، لكن لو كان بقا مدير مش كويس دا بيكرهك في حياتك ، أنا عايز اقولك ان فيه ناس بتقدم استقالتها وهما عدد غير قليل ، ودا بسبب المدير بتاعه اللي شغال معاه في المكان ومطلع عينه وبيحاول انه ينقل نفسه لأي مكان تاني ، ولما ما بيعرفش ينقل بيحاول ياخد اجازة فمايعرفش ففي الاخر بيستقيل من الحكومة ...الشاهد يعني ان المدير دا أمر هام جدا لو كان هيتعبك انت مش هتستحمل الشغل في المكان دا ...بينما لو انت في المكان بتاعك انت المدير خلاص انت مافيش حد فوقك يكدرك أو ينفسن عليه ويديك أوامر او نواهي فوق طاقتك الاستيعابية .
فأنت هنا في الوحدة الصحية في أسوأ الأحوال بيكون مسماك الوظيفي هو نايب المدير وفي الغالب العلاقة بين الطبيب والصيدلي في الواحدات الصحية بيسودها الود والاحترام إلا فيما ندر، خاصة أنت بتقدره وهو بيقدرك وأنت بتشيله وهو بيشيلك ، فأنتو الاتنين بتكونو مرتاحين مع بعض والدنيا بتبقا كويسة خالص.
الأمر التاني بالنسبة للحضور والانصراف في الوحدات الصحية في غالبها الأعم بيكون كويس وفيه مرونة ، إلا لو كان الكاتب بتاع الوحدة الصحية مش كويس ، فغالبا في شغل الوحدات الصحية الموضوع بيبقا أهون ولو عندك ظرف ما وجيت متأخرمثلا 8:15 أو 8:30 أو 9 بتمضي عادي والدنيا بتعدي تمام ، مافيش بقا يتحسب عليك تأخيرات أو يتشطب عليك والكلام دا ، إلا فيما ندر زي ما قولت وإن مايكونش الكاتب بتاع الوحدة كاتب مقرف أو متعب أو شخصيته مش كويسة .
الأمر التالت ان الوحدات الصحية شغلها سهل وسلس مافيش فيه صرف كتير ولا تذاكر كتير ..بعض الوحدات الصحية احيانا مابيكونش فيها شغل خالص لعدم توفر طبيب ، فأنت ممكن تروح من أول اليوم لآخر اليوم معاك مصحف تقرأ فيه أو كتاب تذاكر فيه أو أي عمل مفيد تنشغل بيه لحد ما يجي ميعاد انصرافك وتروح بدون مشاكل.
طيب ايه عيوب الوحدات الصحية ؟
عيبها الاول نقطة الفلوس..مافيش فلوس أكتر من المرتب المرصود لك ..بل احيانا ممكن يجيلك جزاءات وخصومات وما شابه لاسباب مختلفة ...تاني نقطة وهيا أكبر مشكلة بتخنق الصيدلي وتؤرقه في شغل الوحدات الصحية هي التفتيشات ..زى ما قولنا ان من مميزات أمانة المراكز المتخصصة إن التفتيشات فيها قليلة ، هتلاقي العكس في الوحدات الصحية ودا لأن الوحدات الصحية بيفتش عليها طوب الأرض حرفيا ..عد ورايا كدا ..ممكن يجيلك وزارة الصحة من القاهرة لو نزلوا يفتشوا في المحافظة بتاعتك واختاروا وحدات عشوائية يفتشوا عليها ..رقم اتنين بيفتش عليك مديرية الصحة بالمحافظة اللي حضرتك تابع ليها ..طاب مين فيها بالظبط؟ كل المديرية بتفتش عليك..ممكن يجيلك النهارده وكيل الوزارة يفتش عليك ، ممكن تاني يوم تجيلك ادارة الصيدلة ، ممكن تالت يوم يجيلك ادارة الرعاية الاساسية ، ممكن رابع يوم يجيلك ادارة الطب الوقائي ، اللي بعده يجيلك ادارة الطب العلاجي ...كل دول ينزلوا يفتشوا عليك في اوقات مختلفة ، وكل واحد مستقل مع نفسه ، تقوله امبارح كان عندي فلان موجود انت ليه جاي النهارده، يقولك ماليش دعوة بفلان هو بيفتش علي حاجة وانا بفتش علي حاجة تانية ..رقم تلاته من اللي ممكن ينزلو يفتشوا عليك هي الادارة الصحية بالمركز اللي حضرتك تابع ليها ودي برضو ليها اقسام برضو رعاية اساسية وادارة صيدلة وطب وقائي وعلاجي ومدير الادارة ، دا غير التفتيش المالي والاداري اللي في مديرية الصحة او في الادارة الصحية ودول برضو بيفتشوا عليك ..رقم اربعه بيفتش عليك كمان رئيس الوحدة المحلية اللي حضرتك تابع ليها ، كل مجموعة قرى بيرأسها وحدة محلية ورئيس الوحدة دي بينزل يفتش علي حضرتك .
رقم خمسة ممكن ينزل يفتش عليك رئيس مجلس مدينة المركز اللي انت تابع ليه ..يفتش عليك مين تاني؟ ممكن يجيلك تفتيش من مكتب المحافظة اللي حضرتك تابع ليها ..مين تاني؟ يفتش عليك برضو الجهاز المركزي للمحاسبات .
طبعا ديتفتيشات كتير ومتنوعة ..لدرجة ممكن ما يعديش عليك يوم الا لما تلاقي فيه تفتيش عليه ودا يعتبر العيب الاساسي والرئيسي اللي بيؤرق الصيدلي في شغل الوحدات الصحية بخلاف النقطة دي بتلاقي باقي الامور حلوة وشغلها بسيط ومافيش load وفيها مرونة وكمان لو وحدة صحية متطرفة او بعيدة عن المركز بتاعها دا بيقلل معدل التفتيشات بدرجة كبيرة ممكن يبقا كل اسبوع او كل اسبوعين مرة كذلك احداث زي الكورونا في البلد مثلا وكدا بيقلل عدد التفتيشات عليك ممكن يبقا تفتيش مرة في الشهر او ما يجيش خالص ، مش معني كلامي اللي فات ان كل يوم بتلاقي مفتش فوق راسك ، انما انا بذكر الموضوع بشمولية وبحط العدسة علي اكتر عيب بيؤرق الصيدلي في شغل الوحدات علي حسب مكانه، لكن أنا مني واحد بيجيلي تفتيش كل شهر ودا لو جه اساسا، والسبب ان الوحدة بعيدة ومتطرفة شوية وأنا اخترتها عشان النقطة دي ..النقطة مش انا خايف من التفتيش وكدا لكن السبب الاساسي ان التفتيش الصيدلي بيجي يترصد لك اخطاء تافهه وواردة الحدوث بدون مراعاة لانه زميلك في المهنة ودا للأسف الشديد وضعنا كصيادلة في بعضينا ، المفروض ان مثلا مفتش صيدلي جاي لك ويبقا عنده حس وتقدير وعارف مثلا ان انت صيدلي بتصرف علاج كل يوم ووارد تلاقي علبة دواا ناقصة ، ما تكتبليش مذكرة وتحولني نيابة ادارية ! للأسف دا بيحصل من التفتيش الصيدلي، مش هقولك من مدير ادارة ، لأ من التفتيش الصيدلي اللي بيعدي عليك ويلاقي علبة دواا ناقصة يكتب فيك مذكرة ان علبة دواا ناقصة ويحولك نيابة ادارية وفي الغالب سبحان الله تلاقي وكيل النيابة متفهم لدا ويقول طبيعي ان لازم تنقص حاجات طالما فيه صرف يومي وما بتاخدش جزاءات ولا حاجة عشان وكيل النيابة فاهم والمفتش الصيدلي زميلك مش فاهم طبيعة عملك وعايز يضرك ..الشاهد اللي عايز اقوله لحضرتك ان التفتيش مضرته مش انك عامل حاجة غلط وخايف تنكشف ، إنما طبيعة وظيفتك كصيدلي وفيه منصرف وفيه وارد ، دا بينتج عنه طبيعي انه يحصل اخطاء غير مقصودة وتلاقي التفتيش الصيدلي اول ما بيمسكوها عليك كأنهم ما صدقوا مسكوا حاجة ويعملوا بيها مذكرة تترفع نيابة ادارية وفي الغالب بتاخد جزاا وتدفع تمن الادوية المعجزة ودي حاجة مش محببه انها تحصل لك يعني .
دي تجاربي انا في الاماكن اللي عديت عليها وضحتهالك من وجهة نظري وحسب اللي شوفته بنفسي وعاينته ..فاضل بس التأمين الصحي العادي ..ودا لا يُنصح بيه حاليا...بس ....أينعم الأمور دي بتتغير مع الوقت وحاليا فيه التأمين الصحي الشامل في الطريق ودا حاجة غير التأمين العادي..لكن أنا لا أنصح بالتأمين العادي ومشهور من زمان ان التأمين الصحي فيه مشاكل كتير...ضغط شغل كبير.. عهدة كبيرة.. صعوبة النقل منه.. الحضور... وكل ما تحصل زيادات مثلا في الأجور في وزارة الصحة ما بتتطبقش علي التأمين غير بعدها بمدة طويلة لما يرفعوا قضية وحاجات زي كدا دا غير المشاكل التانية وتفاصيل مش عايز اخوض فيها لكن فيه شبه اجماع من كل زمايلنا علي ان التأمين ماحدش بينصح ان حد يشتغل فيه ...لكن الأماكن والهيئات التانية اشتغل فيها بناءً علي انت عايز ايه ..واعرف ان كل مكان فيه مميزات وعيوب ..ودي فروقات فردية بين كل شخص والتاني هيقدر يتأقلم مع اي مكان وهيضحي بعيوب مكان علي حساب مميزات تانية فيه حاببها ومتماشية معاه ومع ظروفه وتطلعاته الشخصية...لو عايز وجاهة وعمل نضيف وتعامل كويس مع الناس روح المراكز المتخصصة...لو عايز شغل اي صيدلي يعمله وهو شغله التقليدي عمل سهل وبسيط وسلس روح المستشفيات العامة والمركزية ..لو عايز عمل اداري مافيهوش عهدة وكدا روح المديريات الصحية ..لو عايز بقا تريح دماغك وتبقا انت مدير المكان ومافيش حد فوقك او مدير يخنقك ويغلس عليك ماعدا التفتيشات يبقا روح للوحدات الصحية .
ولكن مهما كانت زيادة الفلوس أنا ما انصحش حد بأي حال من الأحوال في الشغل الحكومي انه يدور علي فرق فلوس حتي لو كان الضعف بل يدور علي راحته والمكان اللي هيرتاح فيه في المرتبة الأولي ، دا علي فرض ان المكان دا هيديك ضعف المرتب ودا غير واقعي ، النهارده الصيدلي الحكومي بيتكلف علي مرتب يقترب من 3000 ج , حوالي 3000 الي 3400 ج ، النهارده لو قالولك هنكلفك في المكان الفلاني علي مرتب 6000 ج ماتروحش لو المكان دا كان عكس راحتك او انه هو يخليك تقصر في شغلك الخاص وأنت في بداية حياتك والكلام موجه في الجزئية دي للشباب أكتر من البنات .. لو انت كشاب بتدور على مكان يديك فلوس أكتر فأنت بتتكلم في كام؟ الزيادات حتي في المراكز المتخصصة اللي اتكلمت عنها الفرق بسيط لا يستأهل انك تضحي بشغلك الخاص في مقابله 100 او 200-300 جنيه ..بل خليهم 500 ج او 1000 او ضعف المرتب حتي..مش مبلغ يخليك تضحي قدامه في بداية حياتك بالشغل الخاص..العمل الحكومي غالبا ما بتطلعش من وراه قرش بل بالعكس ممكن يبقا بياخدو منك بالخصومات والجزاءات ..بينما لو اخترت مكان مريح مافيهوش ضغوط عمل او ضغوط نفسيه عليك وبتروح وقتك الرسمي بما يرضي الله في وحدة او مستشفي خمس ست ساعات وتقدر بعد كدا تشوف البيزنس الخاص بيك سواء شيفت في صيدلية او صيدليتك الخاصة او حتي عمل خارج المجال الصيدلي فهو دا الأساس بالنسبالك كشاب..بينما في المراكز المتخصصة لو هتزيد فيها مرتب 300-500 جنيه فهيا هتيجي علي راحتك من ناحية ان شغلها مكثف والعهدات فيها كبيرة ولما تيجي تحب تنتقل من المكان بعد كدا او تاخد منه اجازة مش هتعرف لكن أي شغل في الادارات الصحية او المستشفيات او الوحدات الصحية، معاك فرصة ان انت لو مش عجبك المكان هتقدرتعمل انتداب او تنقل منه ولو بطريقة الإبدال ، تشوف مكان موافق بيك وجايب حد مكانك ويتوافق لك ويتعمل اخلاء وتنتقل علي طول، الموضوع أينعم مش بسيط وفيه شوية صعوبات لكن أسهل بكتير من انك تنتقل من أمانات متخصصة واللي زي ما وضحت قبل كدا انها اشبه بالمستحيل احيانا وبتحتاج واسطة اقلها عضو مجلس شعب.
لا أنصح بمستشفيات الجامعة لنفس الأسباب تقريبا اللي قلتها عن المراكز المتخصصة من حيث ضغط الشغل الرهيب والبصمة وصعوبة ان لم يكن استحالة النقل منها بالإضافة لصعوبة الحصول على إجازات فيها.. ومساوئ تانية في مقابل ميزة انه مكان نضيف ووجاهة اجتماعية الخ.. لكن من ناحية المرتب فهو تقريبا قريب من مرتب مديريات الصحة.
كذلك بنوك الدم الإقليمية ودي مالهاش علاقة بشغل الصيادلة من قريب أو بعيد شغلك في الدم ومشتقاته والبلازما واكبر عيب فيها استحالة النقل منها والإجازات صعبة ومكانها دايما في عاصمة المحافظة مالهاش فروع بالمراكز فلو اخترتها عن اقتناع وحابب شغلها وانت بعيد عنها مواصلات ساعتين تلاته فاعمل حسابك تنقل سكنك جنبها والا هتكره نفسك وخصوصا لو بنت ومتزوجة وفيه أطفال مستقبلا هتلاقي صعوبة كبيرة في الاستمرار على حياة بالشكل دا 4-5 ساعات مواصلات غير 6 شغل، يعني وضع مرهق جدا.. ودايما وانت بتختار رغباتك ما يغركش الاسم وبهرجته (فرحة البدايات) وتروح تشتغل تحقق شغف معين جواك ناحية المكان وبعد خمس ست شهور شغل أو بعد ما تؤسس صيدليتك او كبنت تتزوجي وترزقي بأطفال، تلاقي نفسك محتاس َضغط الشغل والمكان اللي اختارته خانقك ورابطك ومأثر على استمرارية حياتك بعد سنة وخمسة وعشرة من استلام تكليفك فيه.
فأنت خلي عينك علي نقطتين :المكان اللي تختاره تبقا انت بشخصك هترتاح فيه ، وتاني نقطة دور علي المكان اللي لو مارتحتش فيه تعرف تنقل منه او تعمل انتداب منه.