مبدئيا الف مليون مبروك ظهور نتيجة تكليف دفعة صيدلة 2021 وعقبال تكليف دفعة 22 وباقي الدفعات ان شاء الله ، وربنا يجعلها خطوة سعيدة في حياتكم.
انا دكتور حسام خريج صيدلة دفعة 2020 ، بصفتى صيدلي مكلف و زى دلوقتي من سنة كنت زيكم كده لسه معرفش اي معلومات ، انا هنقلكم تجربتي الشخصية واختصر عليكم كتير في مشوار تجهيز اوراق الاستلام .
هشرحلكم كل حاجة بالتفاصيل من غير ما تسال اي حد ، يكفي انك تقرا المقالة دى وتشوف الفيديو اللي في اخر المقالة عشان ده هيوضحلك اكتر واكتر كل التفاصيل.
اولا:- عشان تستلم شغلك الحكومى لازم تكون مجهز كل الاوراق بحيث اول ما ينزل قرار الوزير باعتماد نتيجة تكليف صيدلة دفعة 2021 تروح تستلم في اسرع وقت و دة ليه ميزة حلوة جداا انك بتتوزع غي الاماكن الكويسة في المكان اللي رايحه سواء كان مديرية او مكان كويس داخل مستشفي مثلا لانك رايح وكل الاماكن فارغة وبالتاكيد هتكسب الاقديمة في المكان يعني النقطة دي تخلوا بالكم منها كويس.
ثانيا:- هنتكلم عن الاوراق تحضرها ازاي ومن فين خطوة بخطوة بس زي ما فهمتك لازم تشوف الفيديو اللي في اخر المقالة دى عشان انا بحكي فيه بالتفاصيل ، لكن المقالة ما هي الا مرجع ليك بالعناوين بالاوراق اللي هتتحضر.
مسوغات التعيين دفعة صيدلة 2021 اوراق استلام العمل الحكومي للصيادلة
1- شهادة التخرج
بتحصل عليها من الجامعة بتاعتك
في حالة انك خريج جامعة خاصة عليك احضار شهادة المعادلة
2- ترخيص مزاولة المهنة (اصل)
بتستلم منه 3 اصول لما تعمل بتسجل في نقابة الصيادلة وتقدر بعد كدا تطلع منه تاني من امانه التراخيص الطبية في الوزارة
او من النقابة العامة بتعملهولك من هناك برسوم .
3- كارنية النقابة العامة
طبعا لازم يكون ساري ولما تروح بيه جهة عملك هياخدوا منك صورة بعد الاطلاع علي الاصل ، بالنسبة لكارنية النقابة الفرعية مش مهم.
4- موقف التجنيد للذكور
طبعا بتجيب اصل شهادة الجيش او الاعفاء ، لو انت في الجيش حاليا في الخدمة طبيعي مش هتستلم ، طيب لو لسه قدامك شوية بتروح المكان اللي هتستلم فيه وتعرفهم انك في الجيش في الشؤون توريه الكارنية بس بحيث يحط ملاحظة جنب اسمك انك في خدمة عسكرية، عشان ميبعتولكش انذارات والخطوة دي مش مهمة نهائيا ، بمعني حتي لو بعتولك انذارات متقلقش من حاجة وقت ما هتروح تستلم هيسلموك عادي.
5- شهادة الميلاد كمبيوتر (اصل)
* من السجل المدني التابع له او مشروع الرقم القومي .
6- الفيش الجنائي
هتروح قسم الشرطة تعمل الفيش الجنائي موجه لجهة العمل بنفس الاسم اللي ظاهر في نتيجة الرغبات.
و دة مدته 3 شهور وبعدها بيكون اكسباير وتحتاج تعمل غيره و دة بتعمله من قسم الشرطه التابع لك او اي قسم شرطة عموما .
7- إقرار الذمة المالية
من البريد هتشترية وهتسيبه فاضي متملاش فيه اي بيانات بتسلمه لموظف الشئون الماليه ف جهة عملك لما تيجي تسلم الاوراق.
8- الكشف الطبي
بتسال علي مستشفي التامين الصحي في محافظتك بتشتري استمارة الكشف الطبي ، وترفق فيها صورة شخصية وتروح لجهة عملك بعد نزول قرار الوزير باعتماد النتيجة ، لانه مش هيتختم لك قبل ظهورها و وصول القرارات ، وتختم علي الاستماره وتتصل على الخط الساخن 19806 تحجز معاهم معاد للكشف وبعدها بتختم بختم التامين الصحي .
الكشف دا ( باطنة و نظر و عظام و تحليل مخدرات) سعره كان 300 جنيه السنة اللي فاتت ، لو هتروح من غير حجز تليفوني سعره هيكون اغلي بس مش عارف كم دلوقتي ومش بفضل انك تروح من غير حجز ميعاد ، احجز ميعاد افضلك.
وعند تقديم الاوراق اعملوا صورة طبق الاصل من الكمسيون الطبي موظف الشؤون هيفهمك الخطوة دي ✔️
علشان تقدم بيها علي دفتر التامين الصحي الجديد برضه خلال ال3 شهور من ورقة الكشف الطبي بدون ما تروح تعمل كمسيون طبي تاني من اول وجديد.
9- الدمغات
عدد 12 دمغة فئة 1 جنية زرقاء اللون وعدد 12 دمغة فئة 90 قرش من اي مكتب بريد وتخليهم معاك وفي الفديو هفهمك ليه .
10- برينت الرقم التاميني
من اقرب مكتب تامينات هتروح هناك وتطلب ( لو بتشتغل هتروح بعد اسبوعين من ترك العمل ، التفاصيل بقولها في الفيديو )
11- صورة البطاقة + الاصل (للاطلاع) ولازم تكون سارية.
12- عدد 12 صورة شخصية
لازم ضروري يكون معاك الصور لان انت في اللفة دي كل خطوة هيطلبوا صور ف متعطلش نفسك.
13- صورة قرار التكليف
طباعة صورة من القرار لما ينزل بتكون في صفحة في الاول دى بتاخد منها صورة وكمان صورة من الصفحة اللي فيها اسمك.
وبكده تكون جهزت كل اوراقك عشان تستلم شغلك الحكومى ، شكرا لكم وللمزيد من الاستفسارات والاسئلة تواصلوا معي علي تيليجرام drhossam2020@ او عن طريق حسابي علي الفيسبوك HossAm MohAmed وطبعا متنسوش تشتركوا في قناتي علي اليوتيوب و قناتي علي التليجرام PharmaDay .